نوارة نجم تكتب عماد مغنية استشهد

عماد مغنية استشهد

وحزب الله كتر خيره وكمله بعقله حمل اسرائيل المسئولية، مع ان اسرائيل نفت اي علاقة لها بقتله، صحيح الخارجة الامريكية قالت الحياة افضل بدونه، بس وبالرغم من اسرائيل فعلا اثبتت كدبها في حاجات كتير، لكن انا فعلا مصدقة اسرائيل انها ما قتلتوش لاني اعتقد ان اسرائيل ما عندهاش الرغبة ولا النية انها تلعب مع حزب الله تاني، حتى في الحرب الاخيرة في نص المدة جابت جاز وقعدت تقول لامريكا كفاية وكوندوليزا تقول لهم لسه، على اي حال اعتقد ان حزب الله بالذكاء اللي يخليه يعرف مين اللي قتل مغنية زي ما كلنا عارفين
ده ما فاتش يومين على تهديدات جنبلاط والحريري، واعتقد كمان ان حزب الله بالعقل اللي يخليه يطنش بمزاجه ويقول دي اسرائيل
على اي حال حزب الله مش كداب، لان اللي قتل مغنية بيعمل لصالح اسرائيل على كل حال، ولو ان اسرائيل مرعوبة ويدعوت احرنوت بتقول حزب الله ح يلاقي زيه كتير وح يملا الفراغ وح يرد رد سريع يالهوي يالهوي واولمرت عمال يقول والله ما كلمته والله ما جيت جنبه
ودي مش طريقة اسرائيل لما بتقتل حد زي الرنتيسي وللا عياش وللا الشقاقي وللا يس بتقول وبتفتخر بس المرة دي هي عملتها على روحها
على اي حال برضه انا لسة مراهنة على عقل وحكمة حزب الله
ومشيها اسرائيل اللي قتلته
على كل حال الله يرحمه ويتقبله في الشهداء
كان من خيرة الرجال
ولاول مرة اتفق مع رأي اسرائيلي: حزب الله ح يلاقي ما بين رجاله رجال كتير زي مغنية الله يرحمه
وان شاء الله يملا الفراغ بسرعة وان شاء الله يعرف يرد على اللي بيحركوا العملاء
اظن حتى لو الحريري او جنبلاط او جعجع هم اللي قتلوه، وقتلوه في سوريا عشان يحرجوها كمان، فالتلاتة دول مجرد
ادوات في ايد امريكا واسرائيل، واظن ان الرد لازم يبقى على محرك الادوات مش على الادوات نفسها
يعني ان شاء الله جنبلاط ربنا يسلط عليه مخه وياخد جرعة شم زيادة ويخلصنا والحريري يمكن ربنا يسلط عليه الجاكوزي وحمام البخار يفطسه قادر يا كريم تجيلهم من عند ربنا من غير ما حزب الله يوسخ ايديه بدماء شوية صراصير
جبهة التهييس الشعبية